|
Maiatzeko azkeneko egunetan eta ekainean zehar Urdaibai Bird Centerreko ikerlari taldeak Antzandobi arruntaren prospekzio, lokalizazio, markaketa eta jarraipenaren proiektuan aurtengo urterako finkatu diren helburu guztiak bete ditu.
2012. urteko udaberrirako 50 lurralde aurkitu eta prospektatzea aurreikusten zen eta horietariko 30etan arrak markatu eta geolokalizadorea jarri, hegazti honek burutzen duen migrazio hain ikusgarria jarraitu ahal izateko.
Aurkitutako lurralde baten adibidea
Lurraldeen aurkikuntza lanetan bereziki garrantzitsua izan da zentroko boluntarioek egindako lana, hori dela eta, eskertu beharrean gaude bereziki Luis Betanzosi (markaketa lanetan, ikerlari-taldearen partaide izateagaitik), Jose Luis Luzarraga, Alicia Lizaso, Endika Arcones, Ander Areitioaurtena, Josu Castro, Aiala Zaton, David Henderson, Juan Zugazabeitia, Jose Ángel Antxia, Aritz Atela, Leire Martinez, Iratxe Uriguen, Joseba Irazabal, Luis Mª Larrabe, Josu Rubio, Emilio Dilla, Gabriel Telleria, Iñaki Markuerkiaga, Jesus Manuel Etxebarria, Alexander Zabala, Julen Arana, Alberto Unamuno, Asier Rosado, Kepa Intxausti, Juan Angel eta Linari.
Zentroko kolaboratzaileen laguntzarekin, guztira 60 lurralde aurkitu eta jarraitu dira, horietariko gehienak Urdaibaiko Biosfera Erreserbaren barruan.
Aukeratu diren bikoteak Urdaibaiko baserri inguruetan bildu dira, eta gutxienez 3 ugaltze-lurralde konfirmatuta dituzten eremuak aukeratu dira. Holan ba, Urdaibai Bird Centerreko ikerlari taldeak markatu dituen antzandobiak Gautegiz Arteaga, Arratzu, Ajangiz, Foru-Murueta, Ereño-Nabarnizeko ibarretan eta Bermeo eta Busturiko hainbat baserri ingurutan aurkituko ditugu.
Ar baten markaketa prozesua
Era berean, aipatu beharrean gaude, proiektu honekin gurekin elkarlanean dabiltzan Bulgariarrak helburu berdinak lortzear daudela; hain zuzen ere, gaurko egunerako hogeitik gora antzandobi markatu baitituzte.
Hegaztiaren lepoan ipinitako geolokazizaziorako gailua
Orain artekoa proiektuaren lehenengo faseari dagokio, eta momentu honetatik aurrera markatutako antzandobien eta horien lurraldeen jarraipen estua egin beharko dugu, hegaztion ugal-parametroak aztertu eta habia egiteko aukeratu duten inguruaren karakterizazioa burutzeko.
Eta zer esanik ez, hain ikusgarria den migrazioa egiten hasten direneko egunaren zain egon behar dugula (hain zuzen ere, Afrikako hego ekialdera!!), eta itxaroten gelditu beharrean gaude, urruneko lurraldeetan negua igaro ostean, datorren urteko udaberrian puntualki, berriz ere Urdaibaiko baserri inguru honetan elkar ikusi eta egindako bidai txundigarria kontatu diezaguten.
|
