Jakituriaren gordailu itzela hurbildu zaigu Urdaibai Bird Centerrera
Astelehena, 2019(e)ko azaroa(r)en 04-(e)an 20:37etan |
Joan den astean, Busturiako Arrotegi nagusien egoitzakoak etorri ziren bisitan gure zentrora. 80 urtetik gorako dozena bat nagusi izan ziren bisitan parte hartu zutenak. Jende nagusi horien gehiengoa baserri inguruan bizitakoa da, eta beraien garunetan hegaztiei buruzko benetako altxorrak gordetzen dituzte. Eraztuntze saio bat izan zen etorri eta batera ikusi zutena. Beraientzako espresuki harrapatu ziren hainbat hegazti eta beraiekin batera eraztundu genituen. Bitxia eta harrigarria izan zen, txori gehienak ezagutzen bait zituzten, eta gainera txori bakoitzari buruz pasadizoren bat kontatu ziguten. Birigarroa, zozoa, txinddorra (txantxangorria), Txioi txikia edo españoltxua (erregetxoa), kañobera-txoria (lezkaria)... A zelako jakituria!!!!!!! Bisita bukatzeko, zentroko behatokira hurbildu ginen, eta bertan Gautegiz Arteagako padurak ikuskizun paregabea eskaini zigun, mota guztietako ahateak, mokozabalak, ubarroiak, eta nola ez, arrano arrantzale polit bat ere etorri zen guztioi bisita egitera. Aupada handi bat beraientzako, eta jarrai dezatela urte askoan horrelako jakituria eta bizi-pozarekin. |