Arrano arrantzalea bueltan dator

Igande arratsalde honetan, eztei aurreko migrazioan ikusi dugun lehenengo arrano arrantzalea heldu da Urdaibaira. Hezegune ertzean atseden hartu ostean, arrantzan hasi eta minutu gutxitara  lazun edo muble bat (Mugil cephalus) harrapatu zuela ikusi ahal izan genuen.

 

Europako arrano arrantzale gehienak, Afrika subtropikalean egiten dute negu-pasa, hain zuzen ere, Gineako golko inguruko herrialdeetan. Martxoa eta maiatza bitartean, Eskandinabiako herrialde, Alemania eta Eskoziako ugaltze lekuetarantz bueltako bidaia burutzen dute. Azpimarratzekoa da ere, Urdaibai britaniar eta eskoziar populazioentzako migraziorako geldiune oso garrantzitsua dela; eta horrekin batera, Urdaibaiko itsasadarreko uretan dagoen lazun-kopuru handiak, arrano arrantzaleari behar duen energia eta elikagaia eskaintzen dio, egin behar izaten duten bidai luzerako.