Itsasoak ekarritako hegaztiak Urdaibaiko hondartzetan
Astelehena, 2014(e)ko otsaila(r)en 17-(e)an 19:23etan |
Azken asteotan denon ahotan egon dira itsasoan eman diren enbata gogor eta jarraituak. Ikusi ahal izan dugun gisara, olatuek eragindako kalteak bai portuetan eta bai kosta inguruan itzelak izan dira eta komunikabideetan ikusi ditugun triskantzak ikusgarriak izan dira. Itsasoak ekarritako Martin arruntak Lagako hondartzan. (2014/02/15) Gertatutakoarekin batera, komunikabideek ere Kantauriar kostaldeko hondartzetan hainbat eta hainbat itsas-hegazti hilik edo guztiz ahuldurik agertzen hasi zirenaren berri ere eman zuten. Laidako hondartza enbataren ostean. Agertzen diren hegazti gehienak, alzidoen familiakoak izan ohi dira, lanperna-muxuak, martinak eta potorroak esaterako, hegazti horiek negua itsas zabalean igarotzen dute, kostaldera asko gerturatu gabe. Hegaztiok, itsas handiko baldintza latzetara moldatuta daude, baina hainbeste itsas enbata eta hain gogor eta jarraituak izanik, asko eta asko indarrik gabe gelditzen dira eta guztiz nekatuta edo hilik, itsas-korronteek gure hondartza eta kostaldera ekartzen dituzte.
Aurreko enbatetan Antzora eta Mundakatik ateratako irudiak Ez dugu ahaztu behar, enbata hauen ostean hegazti asko ere olio eta galipotaren ondorioz ere hiltzen direla, batez ere itsasontziek egindako garbiketetan egiten diren isurketen ondorioz. Asteburu honetan ere, nahiz eta itsasoa ez den hain bortitz egon, hildako hainbat hegazti agertu izan dira Urdaibaiko hondartzetan. |