Eztei-aurreko migrazioan lehen mokozabal-taldeak Gautegiz Arteagako hezegunean egin du geldialdia

Gaur egunsentian 19 mokozabalek (Platalea leucorodia) osaturiko taldea iritsi da Gautegiz Arteagako hezegunera eztei-aurreko migrazio betean. Egun guztian zehar atseden hartu eta indarrak berritu dituzte, eta ugal garaiko lumaiaz jantzirik ikusteko aukera izan dugu, papar alde horizta eta ugal garaian erakusten duten ohiko gandorra nabarmentzen zitzaielarik.

Haien artean zenbaitek eraztunak zeramatzaten eta hauek irakurri ostean, "U5" bezala identifikatua izan den eta Gautegiz Arteagako hezegunean aspaldiko bisitaria dugun ale baten berri izan dugu, zeina 2011ko Irailaren 17 eta 18an eztei-osteko migrazioan hezegunean elkarturiko 600 mokozabaleko taldeko kide izan zelarik. 600 aletako mokozabalen talde honek eskeinitako ikuskizuna, inoiz Urdaibain espezie honek emandako handiena izan da.

Mokozabalen talde hau, otsailaren erdialdetik aurrera eztei-aurreko talde migratzaileen artean Holandako Wadden itsasora iristen lehenetarikoa izango da.