Holandan eraztundutako Mokozabalen bisita atsegingarria, mundu-mailako hezeguneen eguna ospatzeko ekitaldian.
Larunbata, 2013(e)ko otsaila(r)en 02-(e)an 18:45etan |
Padurara heldu berri zeuden eta Holandako eraztunak zeramatzaten mokozabalen taldetxo batek amaiera ezin hobea eskaini dio, gaur ospatu dugun hezeguneen mundu-mailako egunari. Gaur Urdaibai Bird Center-ean jende ugariren parte hartzearekin batera, hezeguneen mundu mailako eguna ospatu dugu, nahiz eta eguraldia lagun ez izan.
Goizean zehar zentroa ezagutzeko, hezeguneen garrantziaz jabetzeko eta bertan bizi diren hegaztiak behatzeko helburuarekin lau bisitaldi programatu dira. Horrekin batera, hegaztiak paduran behatzeko aukera paregabea izan dugu, Gautegiz Arteagako hezegune honetan nola elikatzen diren, nola hartzen duten atseden eta zingira mirotzaren tankerako harrapariengandik nola babesten diren ikusteko aukera izan dugularik. Ikusi ahal izan diren hegaztien artean, kontutan hartzekoak dira kuliska zuriak, kuliska buztanbeltzak, hegaberak, txilinportak, ubarroiak, kopeta zuriak, antzarrak, lertxunak, lertxuntxoak eta ahate espezie ugari. Gainera hasieran aipatu dugun legez, nabarmentzekoa izan da mokozabal taldetxo baten agerpena; seguruenik, eguraldi txarrak eraginda gure artean atseden hartzeko eta elikatzeko geldiune bat egitea erabaki dute. Gure harridurarako beraietariko hiruk Holandan jarritako eraztunak zeramatzaten, beraz orain, eraztunen datuak eta kodeak bildu ostean eta tramitatu eta gero, itxaron egin beharko dugu beraien jatorri zehatza zein den ezagutzeko.
|