|
Maiatza, ekaina eta uztailean zehar Urdaibai Bird Center-ek Urdaibaiko elaien populazio ugaltzaileari buruzko informazio bilketa bat egiten ari da. Lan hau “Elaia proiektuaren” barruan dago, eta aurreko urteetan egin izan den bezala, aurten ere Urdaibaiko enara habiagileen populazioaren eboluzioa aztertzea du helburutzat.
Jarraipen hau egiteko Urdaibaiko baserri desberdinetara hurbildu ostean, baserrietako jabeei zuzenean galdera-sorta bat egiten zaie informazioa jasotzeko. Izan ere, baserritarrak baitira hegazti txiki hau gehien ezagutzen dutenak eta honez gain urtero urtero baserrietako habiak nola eboluzionatu duten ikusi dutenak.
Lan honen bitartez, gure baserrietako enareri buruzko informazio ugari biltzen ari gara, habia egiten dauden edo ez, noiz heldu diren lehenengoak, errunaldien garapena edo izandako gertakariak, beste espezie batzuen presentzia…
Orain arte daukagun informazioarekin baserrietara lehenengo enarak martxoaren erdialdera heldu zirela ikus dezakegu, bai Urdaibain bertan gelditzeko edo Iparralderago ugaltze tokietarantz migrazioan zihoazela.
 
Honela ba, udaberri honetako baldintza meteorologiko kaskarren ondorioz gure populazioak beherantz egin duela ziurtatu ahal izan da. Ikusi ahal izan dugunez, enara asko hil dira janari faltaren ondorioz, eta habia ugari bertan behera utzi dituzte, horrekin batera baserri batzuetan lehenengo errunaldiak ere galdu dituzte.
Kanpaina honekin Urdaibaiko baserri guztietara heltzea espero da eta abuztura arte iraungo du. Bertatik lortutako datuak beste urtetakoei gehituko zaizkie eta horrela zehazki jakin ahal izango dugu zein den Urdaibaiko populazio ugaltzailearen egoera. Honekin batera, lortutako datuekin landazabal atlantikoko eta baserrietako hegazti sinboliko honen inguruko ezagutzan sakondu ahal izango dugu. |
