Urdaibai Bird Center-ek Hegaztien Mundu Mailako Eguna ospatuko du igandean, urriaren 1ean.

-URDAIBAI RESERVE- Asteburu honetan, Urdaibai Bird Center-ek Hegaztien Mundu Mailako Eguna 2017 ospatuko du eta honen harira, hegaztien eraztunketa saioaz gain ate irekietako eguna ere izango da, doako bisitaldiak eskainiz. Guzti hau, hegaztien munduak Urdaibai Biosfera Erreserban duen garrantziari buruz gehiago jakin nahi duen ororentzat izango da. Horretaz gain, aurreko asteburuan Gautegiz Arteagan ospatu zen ARTeaga graffitismoari buruzko ekitaldi berritzailearen artelanak ikusgai egongo dira herritik zehar zein Urdaibai Bird Centerren.

Bizkaiko Foru Aldundiaren 2017ko Ondarearen Europako Jardunaldien harira Urdaibai Bird Centerrek 6Kmko bisitaldi gidatu bat eskainiko du Urdaibaiko Paduren paisaiaren bilakaera ezagutzeko. Oso harrera ona izan du ekitaldiak, izan ere, albistea argitaratu eta ordu batzuetara bisitaldia bete baitzen.

Ingurugiro hezkuntzaren harira, Urdaibai Bird Center-ek Eusko Jaurlaritzaren eta Bizkaiko Foru Aldundiaren laguntzarekin martxan duen arrano arrantzalearen proiektuaren baitan urri osoan zehar hainbat eta hainbat ikastetxe eta ikasle etorriko dira arrano arrantzalearen bisita egitera. Bertan, hegazti enblematiko hau erabiliz hegazti horren nondik norako guztiak ikasi eta aztertuko dituzte gainontzeko hegaztien eta zer ingurutatik mugitzen den kontutan hartuta.

Esan bezala, igandean urriaren 1ean, Urdaibai Bird Centerrek Hegaztien Mundu-Mailako Eguna ospatuko du eta horretarako ate irekien egun bat antolatuko du doako bisita autogidatuekin eta eraztunketa zientifikoko erakustaldi batekin.

Egun honetan parte hartzen dutenek bai zentrotik  bai Gautegiz Arteagako paduretan kokaturiko behatokietatik, hegaztien behaketa saio paregabe batez gozatu ahal izango dute. Europan umatu ostean Afrikan negua pasatzeko migrazio sasoian sartuta gaudenez  aukera paregabea izango du bisitariak espezie desberdinetako hainbat eta hainbat hegaztiz gozatzeko.

Igande honetarako antolaturiko ekintzen baitan, goiz zein arratsaldez, bisita autogidatuak eskainiko dira (audiogidak erabiliz). Ordutegi jarraia izango dugu goizeko 11:00etatik arratsaldeko 19:00tara.
Bisita autogidatuez gain goizean zehar zentroko teknikariek hegaztien eraztunketa zientifikoari buruzko jardunaldi bat antolatuko dute eta nahi duen guztiak aukera izango du bertan parte hartzeko. Nola eraztuntzen den eta eraztunketan zer prozedura burutzen diren azalduz jardungo dira zentroko teknikariak.