400 lagunek bisitatu dute Urdaibai Bird Centerra Hezeguneen Munduko Egunean

Argi eta garbi dago padurak jende askoren interesekoak direla eta euren bihotzetan daudela. Hezeguneen Munduko Egunean, bisitari kopuru itzela izan dugu Urdaibai bisitatzen, hurbildutako guztiak gogotsu izan dira hegaztiak behatzeko orduan eta padurako neguko garaia eta koloreak ikusteko. Eguna ospatzera etorri diren ehunka pertsonen artean adineko pertsonak, haurrak dituzten familiak eta lagun taldeak hurbildu dira. Edonor izan daiteke naturaren maitale.

Jakina, oraingoan ere naturak ez du huts egin. Astetako euriaren ondoren, ateri izan dugu eta padura guztiz distiratsu, benetan. Adar baten gainean, uraren gainean, Oruetan astebete baino gehiago daraman arrano arrantzalea protagonista izan da. Aukera paregabea izan da gure bisitariek hegazti harrapari bikain honen ikuspegiaz gozatzeko, bereziki haurrak txundituta utzi batitu.

Flamingoak ere gozagarri izan dira denentzat, ahate buztanluzeak, txistulariak eta paitta arrunta ikuskizun bikain bihurtu dira. 

Gure inguruan hain arraroa den Elano urdin bikote batek ere gure begiak gozatu ditu, begi gorriak dituen hegazti harrapari zuri ederrak.

Eguraldi onari esker, eraztunak jartzeko gure erakustaldi zientifikoa egin ahal izan dugu, eta gure gonbidatuek ikasi dute teknika horiek nola laguntzen duten habitatak eta hegazti-populazioak kontserbatzen. Goizean zehar, amilotxak, txontak, kaskabeltzak, gardantxiloak eta txolarreak eraztundu ditugu.

Eskerrak eman nahi dizkiegu egun berezi honetan etorri diren guztiei. Hezeguneak guztion bihotzetan daudela argi dago!!